शिरपूर: महामार्गावर पेट्रोलिंगदरम्यान पोलीस व्हॅनला भीषण अपघात; एका पोलिसाचा दुर्दैवी मृत्यू, दोघे जखमी
धुळे, शिरपूर: मुंबई-आग्रा महामार्ग क्रमांक ३ वर पेट्रोलिंग करत असताना, शिरपूर तालुक्यातील दहिवद पोलीस मदत केंद्राच्या पोलीस व्हॅनचा भीषण अपघात झाला. अचानक टायर फुटल्याने गाडीवरील नियंत्रण सुटले आणि ती उलटली. या अपघातात एका पोलीस कर्मचाऱ्याचा मृत्यू झाला असून, दोन गंभीर जखमी झाले आहेत.
अपघातात पोलीस अमलदार नवलसिंग वसावे यांचा मृत्यू
आज दुपारी दहिवद पोलीस मदत केंद्राची पोलीस व्हॅन (क्र. एम.एच. १८ बीएक्स ०२३२) महामार्गावर पेट्रोलिंग करत होती. त्यावेळी अचानक गाडीचा पुढील टायर फुटला. यामुळे चालक नियंत्रण गमावून बसला आणि व्हॅन रस्त्याच्या कडेला पलटी झाली.
अपघात इतका भीषण होता की, व्हॅनमधील पोलीस कर्मचारी गंभीर जखमी झाले. जखमींना तात्काळ शिरपूर उपजिल्हा रुग्णालयात दाखल करण्यात आले. मात्र, उपचारादरम्यान पोलीस अमलदार नवलसिंग वसावे यांचा दुर्दैवी मृत्यू झाला. तर, अनिल पारधी आणि प्रकाश जाधव हे दोन पोलीस कर्मचारी गंभीर जखमी झाले असून, त्यांना पुढील उपचारांसाठी धुळे जिल्हा रुग्णालयात हलवण्यात आले आहे.
सरकारी वाहनांच्या दर्जावर प्रश्नचिन्ह
या घटनेमुळे पोलीस दलात हळहळ व्यक्त होत आहे. त्याचबरोबर, सरकारी वाहनांच्या देखभाल-दुरुस्तीचा मुद्दा पुन्हा एकदा ऐरणीवर आला आहे. पोलीस कर्मचाऱ्यांच्या जीवाशी संबंधित या वाहनांची प्रशासनाने नियमित तपासणी करणे आणि त्यात दर्जेदार वस्तूंचा वापर करणे गरजेचे असल्याची मागणी या निमित्ताने जोर धरत आहे.
