धुळे पोलिसांचे ‘ऑपरेशन ऑल आऊट’ : एका रात्रीत 23 ठिकाणी नाकाबंदी, अवैध धंद्यांवर मोठी कारवाई
धुळे | प्रतिनिधी
धुळे जिल्ह्यात वाढत्या टवाळखोरीला, अवैध धंद्यांना आणि असामाजिक कृत्यांना आळा घालण्यासाठी जिल्हा पोलीस प्रशासनाने ‘ऑपरेशन ऑल आऊट’ ही विशेष मोहीम राबवली. पोलीस अधीक्षक श्रीकांत धिवरे यांच्या आदेशानुसार मंगळवारी सायंकाळी ७ ते रात्री ११ या कालावधीत संपूर्ण जिल्ह्यात एकाच वेळी धडक कारवाई करण्यात आली.
या मोहिमेत सर्व उपविभागीय पोलीस अधिकारी, पोलीस ठाण्यांचे प्रभारी, स्थानिक गुन्हे शाखा आणि वाहतूक शाखेच्या पथकांनी सहभाग घेतला. जिल्ह्यातील तब्बल २३ ठिकाणी नाकाबंदी करून शेकडो दुचाकी व चारचाकी वाहनांची कसून तपासणी करण्यात आली. अचानक झालेल्या या कारवाईमुळे सार्वजनिक ठिकाणी मद्यप्राशन करणारे, हुल्लडबाजी करणारे तसेच अवैध धंदे चालवणाऱ्यांचे धाबे दणाणले.
🔎 व्यापक कारवाई
या मोहिमेदरम्यान जुगार अड्ड्यांवर आणि अवैध गावठी हातभट्टी दारू अड्ड्यांवर छापे टाकून लाखो रुपयांचा मुद्देमाल जप्त करण्यात आला. शाळा व महाविद्यालय परिसरात बुलेटचे सायलेंसर बदलून मोठा आवाज करणाऱ्या टवाळखोरांवर वाहतूक शाखेने दंडात्मक कारवाई केली. तसेच ‘ड्रंक अँड ड्राईव्ह’ प्रकरणांवरही कठोर कारवाई करण्यात आली.
याशिवाय पानटपऱ्यांवर अमली पदार्थ विक्रीची तपासणी, शहरातील ओयो हॉटेल्स, बार, ढाबे व लॉजेसची झाडाझडती घेण्यात आली. रेकॉर्डवरील गुन्हेगारांची चौकशी करून वॉरंटवरील आरोपींना ताब्यात घेण्यात आले.
⚖️ पोलिसांचा सज्जड इशारा
जिल्ह्यात कायदा व सुव्यवस्था अबाधित राखण्यासाठी आणि गुंडगिरीवर वचक निर्माण करण्यासाठी भविष्यातही अशाच प्रकारची अचानक नाकाबंदी, कोम्बिंग ऑपरेशन आणि विशेष मोहीम राबविण्यात येईल, असा इशारा पोलीस प्रशासनाने दिला आहे.
धुळे पोलिसांच्या या कारवाईमुळे नागरिकांमध्ये सुरक्षिततेची भावना निर्माण झाली असून, कायदा मोडणाऱ्यांमध्ये मात्र भीतीचे वातावरण पसरले आहे.
