फोन चोरीला गेल्यास किंवा हरवल्यास घाबरू नका; या सोप्या ट्रिकने फोन करा ट्रॅक
मुंबई: आजच्या डिजिटल युगात स्मार्टफोन चोरीला जाणे किंवा हरवणे ही एक मोठी समस्या बनली आहे. फोनमध्ये आपला वैयक्तिक डेटा, बँक खात्याचे तपशील आणि आधारसारखी महत्त्वाची माहिती असल्याने, त्याचा गैरवापर होण्याची भीती असते. मात्र, आता काळजी करण्याची गरज नाही. भारत सरकारने या समस्येवर तोडगा काढण्यासाठी एक खास पोर्टल सुरू केले आहे, ज्याचे नाव आहे ‘संचार साथी’.
हे पोर्टल हरवलेले किंवा चोरीला गेलेले फोन शोधण्यासाठी, ते ब्लॉक करण्यासाठी आणि परत मिळवण्यासाठी मदत करते. दूरसंचार विभागांतर्गत काम करणाऱ्या C-DOT (Centre for Development of Telematics) या संस्थेने हा उपक्रम सुरू केला असून, यामुळे आतापर्यंत लाखो स्मार्टफोन रिकव्हर करण्यात आले आहेत.
संचार साथी पोर्टल कसे काम करते?
या पोर्टलचा मुख्य उद्देश म्हणजे, चोरीला गेलेल्या फोनचा कोणीही गैरवापर करू नये. यासाठी यात सेंट्रल इक्विपमेंट आयडेंटिटी रजिस्टर (CEIR) नावाची विशेष यंत्रणा वापरली जाते. ही यंत्रणा प्रत्येक मोबाईलच्या युनिक IMEI नंबरच्या आधारे काम करते.
जेव्हा तुम्ही तुमचा फोन हरवल्याची किंवा चोरीची तक्रार पोर्टलवर दाखल करता, तेव्हा तुमच्या फोनचा IMEI नंबर ब्लॅकलिस्ट केला जातो. यामुळे तो फोन पुन्हा कोणत्याही नेटवर्कवर ॲक्टिव्ह होताच, पोलीस आणि टेलिकॉम ऑपरेटरला तात्काळ अलर्ट मिळतो. या प्रक्रियेमुळे फोनचे लोकेशन ट्रॅक करणे आणि तो परत मिळवणे सोपे होते.
तक्रार दाखल करण्याची सोपी प्रक्रिया
तुमचा फोन हरवला असल्यास, खालील सोप्या स्टेप्स फॉलो करून तुम्ही तक्रार दाखल करू शकता:
1. डुप्लिकेट सिम घ्या: सर्वात आधी तुमच्या टेलिकॉम ऑपरेटरकडून तुमच्या मूळ नंबरचे डुप्लिकेट सिम कार्ड घ्या.
2. पोलिसांत तक्रार: जवळच्या पोलीस ठाण्यात जाऊन फोन हरवल्याची किंवा चोरीची FIR (प्रथम माहिती अहवाल) दाखल करा.
3. पोर्टलला भेट द्या: www.ceir.gov.in या अधिकृत वेबसाइटला भेट द्या.
4. तक्रार दाखल करा: वेबसाइटवर ‘ब्लॉक/चोरलेला मोबाइल’ (Block/Stolen Mobile) हा पर्याय निवडा.
5. माहिती भरा: येथे तुमच्या फोनचा IMEI क्रमांक, FIR चा तपशील, तुमचा आधार-लिंक्ड पत्ता आणि इतर आवश्यक माहिती भरा.
ही माहिती भरल्यानंतर, पोर्टल आपोआप पोलीस, सायबर क्राईम युनिट आणि टेलिकॉम कंपनीला सूचित करते. तुमचा हरवलेला फोन पुन्हा वापरला गेल्यास लगेच अलर्ट मिळतो आणि तो ट्रेस करून परत मिळवता येतो.
