धुळ्यात सराफा व्यापाऱ्यांवर दरोडा टाकणारी आंतरराज्यीय टोळी जेरबंद; एलसीबीची यशस्वी कामगिरी
धुळे, देवपूर: धुळे शहरातील सावरकर पुतळा चौक येथे बंदुकीतून गोळीबार करून सराफा व्यापाऱ्याला लुटणाऱ्या कुख्यात आंतरराज्यीय टोळीला स्थानिक गुन्हे शाखेने (LCB) जेरबंद केले आहे. तब्बल ३,५०० ग्रॅम सोन्याचे दागिने असलेली बॅग हिसकावून पळून गेलेल्या आरोपींना सीसीटीव्ही फुटेजच्या मदतीने अटक करण्यात पोलिसांना यश आले आहे.
नेमके काय घडले?
दिनांक २३/०७/२०२५ रोजी रात्री ८ वाजण्याच्या सुमारास, शहाद्याहून आलेल्या एस. टी. बसमधून व्यापारी विनय मुकेश जैन आणि त्यांचा सहकारी कर्षण रुपाभाई मोदी उतरले. त्याचवेळी एका काळ्या रंगाच्या मोटरसायकलवरून तीन अज्ञात हल्लेखोर आले. त्यांनी तोंडाला मास्क लावले होते आणि पिस्तूलचा धाक दाखवत विनय जैन यांना गंभीर दुखापत करण्याच्या उद्देशाने गोळीबार केला. त्यानंतर त्यांच्याकडील सोन्याचे दागिने आणि पावत्या असलेली बॅग बळजबरीने हिसकावून ते पळून गेले. याप्रकरणी देवपूर पोलीस ठाण्यात गुन्हा दाखल करण्यात आला होता.
सीसीटीव्ही फुटेजच्या आधारे तपास
या गुन्ह्याचा तपास स्थानिक गुन्हे शाखेकडे सोपवण्यात आला. आरोपींना ओळखणारे प्रत्यक्ष साक्षीदार नसताना, पोलिसांनी शहरात लावण्यात आलेल्या सीसीटीव्ही कॅमेऱ्यांचा आधार घेतला. गुन्ह्याच्या ठिकाणापासून मुंबईच्या दिशेने जाणाऱ्या हजारो सीसीटीव्ही फुटेजची तपासणी करण्यात आली. यातून संशयित वाहनांचे क्रमांक मिळवण्यात पोलिसांना यश आले.
तपासादरम्यान, आरोपी मुंबईहून आल्याचे निष्पन्न झाले. पोलिसांनी मुंबईत शोध घेतला असता, ओला-उबेर टॅक्सी चालवणारे आणि मूळचे उत्तरप्रदेशातील प्रतापगढ येथील रहिवासी असलेले आरोपी या गुन्ह्यात सामील असल्याचे समोर आले.
उत्तरप्रदेशातून आरोपींना अटक
आरोपी मुंबईतून उत्तरप्रदेशला पळून गेल्याचे कळताच, पोलिसांनी त्यांचा प्रतापगढ येथे शोध घेतला. अखेर पोलिसांनी मोहम्मद शहरेवार मोहम्मद इबरार खान (वय २४, रा. प्रतापगढ, उत्तरप्रदेश) आणि दिलशान इमरान शेख (वय २१, रा. प्रतापगढ, उत्तरप्रदेश) या दोन आरोपींना अटक केली. या कारवाईमुळे धुळे पोलिसांच्या कार्यक्षमतेचे कौतुक होत आहे. या गुन्ह्यात आणखी कोणाचा सहभाग आहे का, याचा पुढील तपास पोलीस करत आहेत.
